الاهداء / الى السياسين في العراق
مَلِّينه والله مَلِّينه
وحَلِّينا الجيسْ وانْطينه
وكل شي ما بَقْينه
ولا ضَميْنه
گِلنا وكِتَبْنه وصَيَّحْنه
بَسْ بسوگكِ الصفافير
منو اللي يسمع حَچيْنَه
منو اللي يسمع بَچيْنَه
ويشيل من گلبْنَه المَجروح
هاي السچينَه
وهذا الجرح اللي بينه
ما احد يحس بيه
من سياسينه
كل واحد ملتهي بنفسه
وناسي الوطن وناسينه
انتخاب وانتخبنا
واتحملنا وضحينا
وصبرنا عالضيم
وما دعينه
وسكتنه وما حچينه
ولكم مو كافي عاد
بهذا الحر
بطاوة السياسة اتگلينه
واستوينه
واحترگنه
وصرنه فحم
الخاطر الله الحگونه
ويومية تصريح شكل
فضِّينا ... لا ما فضِّينا
وعلى هالرَّنه طحينچ ناعم
يومية واحد يضحك علينه
والنتيجة تيتي تيتي
مثل ما رحت جيتي
ياسكينه
والله انسلّينا
مو كافي يمعودين
ضَحَكْتوا العالم علينه
اختلفتوا مو مشكله
ولا هاي اول مرة
فْضّوهَ بْطُرَّه كِتْبَه
والف سنة ليوره رَجِّعونه
بس فضونه
مَلِّينه .. والله مَلِّينه
ليست هناك تعليقات:
إرسال تعليق