الاهداء: الى القارئ المعجب
دربونتنا إشگد حلوة چانت
تزهي باهله
كل البيوت چنه بيت واحد
عائلة ولمت شمِلهَ
بالفرح الكل تلتم
چنه الفرح بس إله
وان صارت مشكلة يا ستار
الكُل تلتم لحله
والزلم ايد وحده
گلب واحد
شَدّه وحده
أبد ما ينگطع حبله
وان صارت عالدربونه شي
الكُل تتراكض
الكُل تتدافع
الكل ادافع من أجله
والچبير مسموع كلامه
والچبيره الكل يحترمه و يْجِلْه
والله يا أم قدوري
چانت تحبنا أكثر من نَجِلْه
والله يا أم ستوري
يمكن چنه ناكل أكثر من طبخ أمنا
من طبخْه وأكِلْه
وإذا وحدة تمرضت
كل حبيبات الدربونه
يشتغلن بدل عنه
لا غش ولا دغش ولا خيانه
مرفوضه من أصلهه
ولمة النسوان بالعصرية
تتعجب هاللمّه شنو اللمْه ؟
والرياجيل بالگهوه ملتمه
والگهوه فرحانه بِزلِمْه
والبيبان للصبح مْفَتِحه
عيب الناس تخاف أهله
الله شلون أيام حلوه
منو ما يتذكر منو ما يحن
ويشتاق إله
ناس عايشه عالبساطه
وتتعامل على حب الله
(2)
اللي صار شنو ما أدري
دربونتنا هسه تغيرت
هسه غير دربونه
بيوته غير شكل
ناسهه غير شكل
ومرصد صارت البيتونه
ماكو أهل گبل
ماكو رياجيل گبل
ماكو نسوان گبل
أصلاً ما بيه ريحة الدربونه
دربونتنا الحلوه القديمة
لا كميله ولا حسنية ولا أمّونه
وين محبة گبل
وين عشرة گبل
اللي تقسم بين الأهل
الخبزه والصمونه
وين جدرية گبل
الكل تاكل منها وماعون
للجيران ايدزونه
وهسه كل واحد يخاف جاره
الله أكبر وما أحد ينام
إلا للجار يحلفونه
حتى البزازين صارت عداوة
بزونه تلحگ بزونه
ولكم شجاكم هذا الحقد والغدر
من أشوكت بالگلوب مدفونه
لو شغله جديده
من برَّه اجتكم
أمنين استوردتونه
فرَّقتكم وشرَّدتكم
هاي الشراره الملعونه
قشمرت وضحكت عليكم
بحجايات وهميه مدهونه
وخلّت ناس تُكتل ناس
والباقي يهجرونه
وصارت مصايركم
بيد الشيطان مرهونه
ومشيتوا بلا عقل ولا تفكير
وره هاي الريح المجنونه
وتالي متالي صفت الكل خسرانه
والحسره بالگلوب مخزونه
والورطكم الكل يعرفونه
منو ومنين ؟ واشلون نمّونه
(3)
دربونتنا هسه حزينه وكئيبه ومهمله
وبكل زاويه بيها تبچي أرمله
خطف منها الرجال حرمله
وچم حرمله
وچم هولاكو وچم مجرم محترف
زارونا بهالمرحله
وعلّمونا شلون نكتل
أشلون نِعْدِم بالمقصله
أشلون بالگطنه نذبح
ونرمي الجثه بالمزبله
ولكم ليش وعلى مال من
هالمسخره وهالمهزله
وچم أم صارت هسه مخبلة
أطفالها گدام عينه
لو مذبحه لو مجندله
ولكم أكو واحد يكتل هله
أكو واحد يهدم بيته
على راسه وراس هله ؟
هذا شغل السياسه
من دنعل ابو السياسه لابو هله
الليّ تفرق وما تجمّع
بين واحد وهله
وانتبهوا يا ناس
لهاي المسأله
لهاي المشكله
الليّ فرقتنا وما جِمْعَتْنَه
شَرْذمَتْنه وما لَمتْنه
دَمَرِتْنا وما بِنَتْنه
تِرْكتْنا وما حِمَتْنه
وهاي خطه مضبوطه
مو مهلهله
جيب عاقل ويفتهم
أشلون يفكر بالأمر ويحللّه
ويحمي الشعب ومستقبله
بس أگول بكل الأحوال
مهما جرى ومهما صار
ترجع دربونتنا أيام زمان
حلوه ومزيونه ومكحله
ليست هناك تعليقات:
إرسال تعليق